Hossein Tavafi

______________

حسین طوافی
_____________________

خنده ونگاونگ

تام نزه ه ه ميجيك
غورصه غورصه رو
هلاچي اوير
زاكي رودورو

آفتاب چرك ِ تاو
ديل تاسياني
الله دار ِ نقش
اَمي مياني

باهار نقشينه
بابا خان ِ ديم
بيا ناجييا
نرگسا فاديم

جه دامون بيگير
تا خوشك راكه
جيجا بو ناردار
فرهاد ِ زاكه

گب گاهي گلف
دريا غرقابو
تام نزه ميجيك
چايي سردا بو

مي دس ِ ميان
شوروم و آرسو
آسمان ِ ديل
نانم چي دوبو

مي ديل ديياما
توو گرم ِ مووردال
تي چووما واكون
تي تي بزه تال

بدا دريا ديل
هَتو بخانه
توو حاج حاجي و
من خودا خانه

مانگه تاو واشاد
خوو ني ني كانا
دريا اورگاده
خوو آسمانا

آبابو آرسو
خنده ونگاونگ
سجل بي احوال
ميرزا بي توفنگ

ستاره سوسو
جه تاسياني
ورگان ِ اواو
جه تاسياني

انجير دارمه
جوداجه دامون
ديل ابران ِ سر
شوء ون ِ وخت امون

خولي دار اوير
ولگ ِ نار اوير
هلاچي اوير
زار و زار اوير

ناجه به ناجه
آسمان واو ِه
آفتابْ دار ِ ور
بي كسي تاوه

سايه بي سايه
بي سايه ديمه
هرجا فاندري
آتش بي هيمه

مي جان ِ مهتاب
تي اوخان تاوه ؟ه
يخ بزه آرسو
ايباري وابه ؟ه

سوسو ديم ! بتاو!ه
مرا آبا كون
دشخار مي ديلا
تي غمچا واكون

راشيان به را
همه خوفته ائيد
كلمان چره
پس جوخوفته ائيد ؟ه

شنبه مي نامه
بي نام و نيشان
يكشنبه واهيل
نيشان به نيشان

دوشنبه مي ديل
امبست ِ‌ غورصه
بوگو تي خنده
اكه فارسه ؟ه

سه شنبه بيدار
نوگو خوفته مه
چارشنبه جيبا
توندي مجمه

اخه توو ناني
پنشنبه چيسه
مي ديمه شي هي
جه ولگ جيويزه

مي جومعا بيدين
شووئن ِ شينگايه
داني اكه جا
چوم تي رافايه

مي چوم ِ رنگا
اوسانم شمه
خودا دانه كي
من فارسمه

شب خو شبلايه
واشاد سوف سر
آمولاي بوخوفت
كره لوف سر

سوسو بي سوسو
بشكفته وي خاش
كولك سونه دار
ميوه دهه ، واش

مارلالايي
شه اويرابه
پئر چانپسه
زودي پيرابه

خنده ونگاونگ
غورصه غورصه رو
ايشكفه ميره
گول شوكوفه رو

گيل بازه دريد
سيفيدي زاكان
دريا اوشتره
آزادي چاكان

اگه كون سو كون
دارما ببه
اگه دارخال
شيري را ببه

ميزگيره بما
دارا بوجور شم
بودوزه مانگه
جه جور فاكشم


توقايي ايي پم
مردن ِ واجور
...
.....

نا جه به ناجه
غورصه غورصه رو
ايشكفه ميره
گول شوكوفه رو

مرگا ويشتايه
سرايي ناره
هرجا فاندري
ان كوگايه

گيلانشا ويريشت
بي شينگايي جا
امي ناجه يا
گيد آزادي وا

دامون جيجابو
تي تي سييايه
آزادي اوخان
امي هرايه

آزادي غمچه
ايتا روز وابه
خورشيدم ايي روز
امره تابه

آزادي چاكان
سيفيد وراكان
مي ديم و تي ديم
خورشيد ِ زاكان

آليمالايان
هنوز ايساييد
ميرزا ايلجاران
فكر ِ فرداييد

وارش ايلافند
غورصه غورصه رو
زرد ِ چاك مي ديم
بي شوند و آرسو

گيله مرد ما
مي دس بجاره
ناريد مي رگان
ترسي جه داره

چني سخته يار !ه
امي سيوايي
تره تام تومي
مره توقايي

توو ترهِ دريا
من تي كاكايي
توو كاريكامات
من تي فدايي

مي نيشاني يا
اوسانم شمه
خودا دانه كيي
من فارسمه

ابا وئر نزن
ويد ِ وشت ِ ره
دوزخا نيهين
ا بهشت ِ ره

بينيش ماشينا
تا ابد فوران
كاسه رنگانا
جه چوم دتران

راشي سوايين
تي جا دواره
سبقت و ايسان
د معنا ناره

اويا خوري سو
گئشه چاكونه
فاده ابرانا
گونا پاكونه

شب خوس دارانا
فادم ابرانا
پوردابم / دفراز
تي روخانانا

چايي سردا به
درمان دردا به
اسپيد رود ِ آب
جه غم زردا به

ناجه به ناجه
امي ديل واهيل
چايي رو اما
ايي وجب كاتيل

گوشه اوسانم
غما زنگ زنم
اشغال ِ سيگنال
مره ونگ زنم

بييه تا بيشيم
دس به دس فاديم
...
.....

اوخان به اوخان
دامون به دريا
دريا به آرسو
تي چوما چي وا ؟ه

بييا تا بيشيم
ورگا مرگا ديم
عملي مانگه
بييا تركا ديم

تاوه ايتا روز
ان دورغ نييه
مانگه تاوه سو
خيالي چييه ؟ه

مي جان ! توقا
نصيب سيوايي
ناردار ِ آرسو
ديمه جيجايي

خورشيدا بيگير
فادن تي ديلا
تي لبا واكون
اوي ! كيلا ! كيلا !ه

آزاد ِ واچوك
ابرا دساسين
ماچي يا رافا !
زنجيرا واوين

انزلي بي تاب
دريا لپه سر
خابا شو مورداب
تال زپه سر

آينه تترج
من و من و من
ائيدي شيدي
پيل لاكومن

اشتر ايسما
سو مرا تابه
مي دشخارده ديل
چره بي تابه ؟ه

باد ايستكان
اگه بلرزس
جنگل آينه
اگر فوگوردس

اگر راشي يان
ده برانيئيد
زرد بولبولان
خوش صدا نيئيد

نقاشي كونم
ايروزي آبه
زرد تاش زنم
سوربي مهتابه

سقف سر ايسم
ابرا واغوزم
شي ره دس كشم
معنا نيويسم

ايمرو كيي خورشيد
دريا تان بوخوفت
درفك ميزگره
اي جيگا جوخوفت

فردا گرمشا
مي جيب نهمه
مي نيشاني يا
اوسانم شمه

هسه كيي خانه
بد جور خرابه
بي كسي مهتاب
بدا بتابه

گيلان – آذربايجان -1583


___

Violin Concerto In G Minor BWV 1056 Allegro/J.S Bach 1685-1750 German

Performed by: Itzhak Perlman (1945- ) violinist/conductor b.Tel Aviv

English Chamber Orchestra/Conductor:Daniel Barenboim (1942- )b.Argentina

________________